MFIP: Kev Kawm thiab Cob Qhia Ua Hauj Lwm

Feem ntau cov niam thiab txiv tau pob nyiaj MFIP yuav tsum nrhiav thiab mus ua hauj lwm. Yog koj xav tau kev kawm ntawv ntxiv los sis kev pab cob qhia txoj kev ua hauj lwm, koj yeej yuav txais tau kev pab. Koj yuav tsum nug txog tej koj xav tau thiab qhia tias yog vim li cas nws yog ib txoj hau kev npaj zoo. Nyeem daim ntawv qhia tseeb no thiab hu rau lub koj hoobkas legal aid yog koj xav tau kev pab. 

Thaum koj pib MFIP, koj mus ntsib ib tug kws pab nrhiav hauj lwm uas nws yuav “ntsuam xyuas” txog koj kev ua hauj lwm. Qhov no txhais tau tias nws yuav nug koj lus thiab xav paub txog koj seb yuav pab koj nrhiav thiab tuav koj txoj hauj lwm li cas. Tus kws pab nrhiav hauj lwm txheeb txog koj kev kawm ntawv, tej yam koj nyiam txaus siab rau, keebkwm ua hauj lwm, koj tej txuj tes taw, thiab seb tej hauj lwm muaj uas tab tom yuav txais tib neeg puas yuav “thooj koj.” Txoj hauj lwm tias yuav thooj rau koj mas yuav tsum yog them nyiaj tsawg kawg nkaus li nom tswv txoj cai tswj them, hom hauj lwm muaj kev ruaj ntseg thiab zoo xis neeg, thiab haum koj tes taw thiab laj lim tswv yim los ua tau.

Tus kws pab nrhiav hauj lwm yuav tsum nug koj txog kev zov menyuam thiab kev caij tsheb mus los thiab koj puas muaj lwm yam xwm txheej txog koj tus kheej los sis teeb meem nyob hauv koj tsev neeg uas yuav nyuab rau koj nrhiav hauj lwm ua los sis tuav koj txoj hauj lwm, nrog rau kev sib ceg sib ntaus hauv tsev neeg.

Tus kws pab nrhiav hauj lwm yuav tsum nug koj seb koj puas toob kas rov mus kawm ntawv dua rau koj tej daim ntawv pov thawj ua hauj lwm los sis daim ntawv tso cai ntawm nom tswv. Yog yuav tau mus, qhov no yuav tsum nyob rau koj kev npaj los nrhiav hauj lwm.

Qhia rau koj tus kwv pab nrhiav hauj lwm yog tias koj muaj kev mob hlwb/nyuab siab, siv yeeb tshuaj, haus dej cawv los sis muaj kev txhawj xeeb kawm ntawv uas yuav nyuab rau koj mus nrhiav los sis tuav ib txog hauj lwm.

Qhia rau tus kws pab koj nrhiav hauj lwm yog tias koj tsis to taub lus Aaskiv txaus los sau koj daim ntawv tso npe ua hauj lwm, sib txuas lus seb puas tsim nyog rau luag yuav koj mus ua txoj hauj lwm, los sis puas yuav ua tau raws li lawv cov cai thaum hauj lwm. Lawv yuav xeem ntsuas seb koj puas paub Aaskiv zoo. Yog soj ntsuam tau tias koj qhov peev xwm hais Aaskiv qis dua qib (SPL6),  koj mus kawm tau ntawv Aaskiv ESL kom txog rau thaum koj to taub Aaskiv txog qib SPL6. Tsis txwv puas tsawg teev koj mus kawm ntawv ntev los luv.  Koj yuav ib ke kawm ntawv nrog lwm yam hauj lwm los nyob ntawm koj. Tus kws pab nrhiav hauj lwm yuav saib seb koj kev kawm nce npaum li cas 3 lub hlis ib zaug twg.

Muaj 2 yam kev kawm ntawv ESL.

• Kev kawm txog mus nrhiav thiab tuav hauj lwm. Cov hoob kawm ntawv no qhia kom koj paub nrhiav thiab tuav ib txoj hauj lwm. Lawv kawm li 20 teev tuaj rau ib lim piam. Koj tus kws pab nrhiav hauj lwm yuav muab koj tso rau hoob uas qhia ceev heev yog tias muaj kawm.

• Cov hoob kawm lus Aaskiv xwb. Cov hoob no qhia kom pab koj rab peev xwm hais lus, nyeem ntawv thiab sau ntawv Aaskiv.

Yog tias koj tsis tau muaj 18 xyoo, koj yuav tsum nyob rau kev kawm qib 9-12 kom tau daim div plhaus mas (diploma) los sis daim GED. Yog koj muaj 18 los sis 19 xyoos thiab tseem tsis tau txais koj daim diploma los sis GED, koj xaiv tau mus ua hauj lwm los sis mus kawm ntawv. Yog koj xaiv mus kawm ntawv, cov sij hawm ntawd yuav tsis muab coj los suav ntxiv rau koj tsis txhob tau tshaj qhov 60-hli.  Yog tias koj xaiv mus ua hauj lwm no ces lawv suav.

Yog tias koj tsis tau muaj daim diploma ntawm qib 9-12, daim GED, los sis daim diploma kawm  ntawv rau cov laus, koj muaj feem xyuam los kawm Adult Basic Education ntawv qhia rau cov laus. Qhov no koj yuav xaiv tau muab koj cov teev mus npaj nrhiav hauj lwm los siv rau koj txoj kev kawm ntawv. Lub ntsiab ces txhais tau tias yog koj yuav muab koj cov sij hawm uas koj teev tag rau hauv koj txoj kev yuav npaj mus nrhiav hauj lwm ua ntawd coj los siv rau sab kev kawm ntawv. Tus kws pab nrhiav hauj lwm yuav saib seb koj kev kawm nce npaum li cas 3 lub hlis ib zaug twg.

Tej cai tswj kev cob kawm hauj lwm thiab kev kawm tom qab qib 12 tau hloov raws lub sij hawm lawm. Cov cai hloov tshiab muaj raws li no:

• Koj muaj li 4 xyoos uas cia koj mus tso npe kawm cob ua hauj lwm los sis kev kawm ntawv  tom qab qib 12. Qhov nod txhais tau tias koj muaj sij hawm mus kawm kom tau daim ntawv 4 xyoos thaum koj tau pob nyiaj MFIP.
• Koj tsis tas yuav ntxiv lwm yam hauj lwm rau koj txoj hau kev npaj. Koj siv tau tag nrho koj cov sij hawm rau koj txoj kev kawm ntawv tau.
• Peb lub hlis twg koj tus kws pab nrhiav hauj lwm yuav los saib seb koj puas nce tau txaus li siab xav.
• Koj yuav tau nrog tus kws pab nrhiav hauj lwm tham txog koj cov tswv yim  npaj rau kev kawm, tiam sis koj tus kws pab nrhiav hauj lwm tsis tas yuav pom zoo rau koj kev kawm ntawv thiab kev cob qhia ua hauj lwm. Koj tus kws pab nrhiav hauj lwm yuav tsum pab muab tej ntaub ntawv, muab tswv yim rau koj txog cov hauj lawm koj ua tau raws li koj txog kev xaiv kawm, pab koj txheeb seb koj puas ua tau li lawv cov kev yuav tsum tau ua txais tib neeg mus kawm ntawv, thiab tham nrog koj txog koj tej peev xwm thiab cov kev nyuab.
• Koj tsis tas yuav tau koj tus kws pab nrhiav hauj lwm qhov tswv yim yog tias koj twb nyob rau ib qhov kev kawm txoj hauj lwm paub zoo, ib qhov kev kawm cob qhia ua hauj lwm uas ntev li 12 lub lim piam los yog tsawg zog, los sis tias koj twb  kawm txog rau xyoo kawg ntawm koj  kev kawm ntawv tom qab qib 12 los sis kawm nyob rau kev cob qhia los ua hauj lwm yuav siv ntev tshaj 1 xyoos.
• Koj muaj li 12 lub lim piam tom qab koj kawm ntawv los sis kawm kev cob qhia ua hauj lwm tiav los mus nrhiav hauj lwm raws li txoj kev koj mus kawm. Yog koj nrhiav tsis tau txoj hauj lwm raws li qhov koj mus kawm, koj yuav tsum txais tej hauj lwm uas txawm tsis raws li koj kev mus kawm los. Los sis koj mus ntsib tus kws pab nrhiav hauj lwm kom nws nrog muab koj txoj kev npaj nrhiav hauj lwm hloov los mus nrhiav lwm yam hauj lwm ua.

Rau tag nrho cov kev kawm ntawv teev tseg saum toj, koj siv tau li ib teev kawm ntawv los mus rau ib teev nyob hauv hoob kawm ntawv los rau koj cov sij hawm. Tus xib fwb yuav tsum pom zoo tias tsim nyog koj siv sij hawm npaum cas.