Muab daim ntawv no los ntawm Social Security lub hoob kas:
“SSA-561 Request for Reconsideration”
Yog hais tias koj tawm tsam kev txiav txim tsis kam muab nyiaj xiam oob khab rau koj, koj kuj yuav tsum muab daim ntawv:
“SSA-3441 Disability Report – Appeal”
“SSA-827 Authorization to Disclose Information to the Social Security Administration”
Mus muab cov ntawv hauv computer mus ntawm www.ssa.gov (lus Askiv xwb) thiab nias daim ntawv cov lej cim rau qhov chaw tshawb. Teb cov lus nug hauv cov ntawv kom tiav thiab muab xa los yog nqa mus rau Social Security lub hoob kas nyob ze ntawm koj.
Yog xa daim ntawv tawm tsam xiam oob khab hauv computer mus rau ntawm www.ssa.gov.
- nrhiav lub npauv hais tias “Disability”
- nias qhov hais tias “Appeal a Decision” nyob ntawm ntu sab xis
- nias lub npauv xim xiav hais tias “Reconsideration”
- nias lub npauv xim xiav tom ntej hais tias “Request Medical Reconsideration”
- Social Security yuav tsum tau txais koj daim ntawv Thov Kom Rov Soj Ntsuam Xyuas dua ua ntej 60 hnub tom qab koj tau txais daim ntawv tsis kam muab nyiaj. Qhov 60 hnub pib suav hnub tom qab uas koj tau txais daim ntawv tsis kam muab nyiaj. Social Security yeej ntaus nqi tau hais tias koj yuav tsum tau txais daim ntawv ceeb toom 5 hnub tom qab hnub sau rau hauv daim ntawv ceeb toom.
Yog hais tias Social Security txais tsis tau koj cov ntawv tawm tsam txog lub sij hawm ntawm, koj cov ntaub ntawv lig lawm. Yog hais tias koj tsis muaj laj thawj zoo vim li cas ho lig, koj yuav tau rov qab pib dua ua ntaub ntawv thov nyiaj xiam oob khab tshiab.
- Yog hais tias Social Security xav txiav koj cov nyiaj, koj yeej tseem tau txais nyiaj SSI thaum koj tab tom tawm tsam. Tab sis Social Security yuav tsum tau txais koj daim ntawv Thov Kom Rov Soj Ntsuam Xyuas dua ua ntej 10 hnub tom qab koj tau txais lawv daim ntawv ceeb toom mas thiaj li yuav tshwm sim tau. Koj yuav tsum thov kom lawv xa nyiaj tuaj rau koj mus ntxiv. Koj yeej tseem muaj 60 hnub kiag los tawm tsam txoj kev txiav txim, tab sis koj cov nyiaj SSI yuav raug txiav yog hais tias Social Security tsis txais koj cov ntawv tawm tsam ua ntej 10 hnub.
- Yog hais tias koj tsis tawm tsam, koj yuav poob koj txoj cai los tawm tsam. Tab sis, yog hais tias koj rov qab thov dua tuaj raws li sij hawm, koj kuj thov kom rov qab qhib thawj txoj kev txiav txim thiab thov kom muaj nyiaj rov qab mus rau lub sij hawm ntawm.
Koj ua tau koj tus kheej los yog mus nrhiav ib tus kws lij choj. Hu lub hoob kas muaj kws lij choj pab dawb “legal aid”.
Muaj 3 hom kev rov luj/xav dua (recon): rov ntsuam xyuas dua rooj plaub, rooj sab laj, thiab hais rooj plaub. Xaiv qhov kom hauv koj tshaj. Khij qhov koj xaiv nyob rau daim ntawv.
- Yog tawm tsam kev txiav txim tsis tau nyiaj xiam oob khab, kev rov ntsuam xyuas dua rooj plaub tsuas yog tib txoj kev xaiv xwb. Ntawm qhov rov ntsuam xyuas rooj plaub, koj ntxiv tau pov thawj thiab cov lus muaj tseeb rau koj phau ntawv. Koj yuav tsis ntsib tus neeg uas ntsuam xyuas koj cov ntaub ntawv.
Kev tawm tsam them nyiaj tshaj, txo nyiaj, los yog txiav nyiaj vim tsis yog kev muaj mob, koj muaj cai xaiv mus hais rooj plaub los yog rooj sab laj. Kev txiav txim tsis yog los ntawm kev muaj mob mas yog xws li muaj nyiaj ntau los yog kev pab ntau zog lawm, muaj npe nyob rau hauv tuam txhab tso nyiaj uas tsis yog koj li, los yog qhia koj hais tias koj tau txais nyiaj twb tsis tsim nyog tau txais. Koj tau mus ntsib tus neeg uas yuav los txiav txim rau koj txoj kev tawm tsam. Rooj sab laj no feem ntaus nyob nram Social Security lub hoob kas.
- Kev tawm tsam kev txiav koj cov nyiaj (hu ua “cessation” ntawm koj kev xiam oob khab), koj muaj cai tuaj mus hais tim ntsej tim muag. Koj mus ntsib tau tus neeg uas ntsuam xyuas koj cov ntaub ntawv. Rooj sab laj no tsuas yog sib tham xwb thiab feem ntau mas mus hais rooj sab laj ntawm lub xeev Disability Determination Services (DDS) lub hoob kas.
Koj coj tau tim khawv tuaj teev lus. Zaus no tsis yog zaus kawg tuaj hais rooj sab laj. Yog hais tias koj swb thaum mus sab laj nrog DDS, koj muaj cai mus hais rooj plaub nrog tus Administrative Law Judge (ALJ) tom qab. Koj yuav tsum tawm tsam txoj kev txiav txim los ntawm DDS rooj sab laj ua ntej 10 hnub kom thiaj li tau koj cov nyiaj thaum koj tos teem rooj plaub nrog ALJ.
Npaj kom txhij rau koj rooj sab laj. Sau ntawv teev txog cov lus muaj tseeb, nrog rau cov pov thawj tshiab. Qhia Social Security txog cov kws kho mob tshiab, cov kev pw tom tsev kho mob, los yog cov kev kho mob. Yog koj muaj teeb meem txog yam tsis yog kev muaj mob, koj yuav tsum mus muab cov ntawv tom tuam txhab tso nyiaj, ntawv yuav tsev, ntawv yuav tsheb, thiab lwm cov ntaub ntawv tseem ceeb. Koj muaj cai mus saib koj phau ntawv ua ntej rooj sab laj.
