Kab Txaj

Kab txaj yog ib co kab me me tsis muaj tis uas ntxais ntshav ntawm cov tsiaj ntshav so, li tib neeg.  Thaum lawv dhaug lawv luaj li noob yeeb.  Cov kab txaj laus ntev li ¼ inch.  Thaum lawv nti tawv tag lawv dawb txho. Tas ces lawv tig ua xim daj li, kasfes, lossis moj kiab.  Thaum lawv ntxais ntsav tag lawm tej zaum lawv yuav muaj ib thaj doog liab lossis dub nyob ntawm nruab nrab lawv lub cev.  Thaum thab lawv ces lawv nrhiav kev nkaum ntawm tej kis tsau tsau lossis nkhib tsev tawg pleb. 

Cov kab txaj nyiam chaw sov.  Cov kab txaj tawm dua thaum ib tag hmo uas neeg tseem tabtom tsaug zog.  Tabsis tejzaum lawv yuav tawm los thaum nruab hnub thiab yog tias lawv tshaib plab. 

Cov kab txaj nyiam nyob li 7 feet ntawv lawv cov khoom noj.  Lawv ciaj sia tau ob peb hlis ntxawm tias tsis noj dabtsi li, thiab lawv yuav khiav mus nrhiav khoom noj.  Cov kab txaj keej mus ib qhov chaw mus rau lwm qhov.  Lawv khawm tej khaub ncaws thiab khau, nkaum ntawm tej rooj tog, phij xab, thiab thawv ntawv, kom coj tau lawv mus rau lwm qhov chaw uas muaj khoom noj.  Vim li no es kab txaj thiaj li muaj nyob tom tej chaw saib yeej yaj kiab, khwv muag khaub ncaws, thiab cov tsev apartment. 

Feem coob, neeg paub tias lawv muaj cov kab txaj tom qab lawv twb raug tom tag lawm.  Thaum lawv khawb cov chaw tom, tej zaum yuav sawv pob.  Tsis yog txhua leej hnov khaus lossis sawv pob tom qab raug tom thiab khawb.  Vim li no thiaj li nrhiav nyuaj tias cov kab txaj nyob qhov twg hauv lub tsev apartment. 

Cov kab txaj tseg tej qho zoo li ntshav qhua tom qab lawv tom tag.  Ua ntej tshaj plaws, tshawb xyuas koj cov ntaub puas txaj.  Tas ces tshawb xyuas koj cov txaj, tshwj xeeb ntawm txoj kab lub txaj xaws los uake.  Nrhiav tej tee xim doog liab.  Koj yeej pom cov kab txaj laus, tshwj xeeb tom qab lawv nyuam qhuav nqus ntshav tag. 

Cov kab txaj tsis tshua lam tawm nkag yog hais tias lawv tsis muaj coob.  Lawv nyiam nkaum ntawm tej chaw zoo li txaj, nruab nrab cov rooj zaum, thiab tej khib tawg pleb, kis ntoo hauv pem tej, kom txog thaum sijhawm lawv yuav noj dua.  

Kom ib tug neeg kuaj tsev tuaj kuaj seb puas muaj kab txaj hauv koj lub tsev apartment.  Lossis koj ntiav tau ib tus kws tua kab tuaj kuaj.  Lawv mam li sau ib daim ntawv qhia rau koj tias koj muaj kab txaj hauv koj lub tsev xauj.  

Thaum koj paub tias koj muaj kab txaj lawm, koj yuav tsum maj nroog ua kom tsis txhob kis mus rau lawm qhov chaw ntxiv thiab muab lawv tua kom tuag. 

Ceevfaj txog siv nyiaj yuav tshuaj tua kav txaj tom khw.  Zoo dua yog cia rau cov kws paub tua kab tuaj tua.  Sau ntawv qhia koj tus tswv tsev sai li sai tau yog koj xav tias koj muaj cov kab txaj hauv koj lub tsev apartment.  Muab daim ntawv qhia tais muaj kab txaj no luam xa nrog rau koj daim ntawv hais kom koj tus tswv tsev tuaj tua cov kav txaj. 

Yog koj tus tswv tsev tsis lis qhov teebmeem kab txaj no, koj muaj lwm txoj kev taug.

• Koj hu tau rau qhov chaw kuaj tsev kom tuaj kuaj seb puas muaj kab txaj hauv koj lub tsev apartment Tus kuaj tsev mam li sau ib daim ntawv qhia tias muaj kab txaj hauv lub tsev apartment thiab hais kom tus tswv tsev kho qhov teebmeem.
  
  Tus kuaj tsev teem ib lub sijhawm kom ua tsum ua tiav.  Yog lub sijhawm dhau es tus tswv tsev tsis tau ua dabtsi li, koj mus ua tau daim tawv foob kom tsev hais plaub tuav nyiaj them qhi tsev.
   
• Koj pib ua daim ntawv foob kom tsev hais plaub tuav nqi tsev tau, tsis tas kuaj tsev ua ntej.  Yog tias 14 hnub dhau txij thaum koj xa daim ntawv mus rau tus tswv tsev thiab cov kab txaj tseem nyob hauv lub tsev apartment, ces koj pib ua tau daim ntawv foob kom tsev hais plaub tuav nqi tsev. 

Saib peb daim ntawv muaj tseeb Mus Cuag Koj Tus Tswv Tsev Kom Xyuas Kev Kho  los kawm txog mus ua ntaub ntawv rau tej yam plaub li no.

Nco tseg:  Cov neeg pab tswv tsev thiab neeg xauj tsev hais tsis sib haum txog tus tswv tsev yuav tsum ua li cas kom txhob muaj cov kab txaj lawm.  Ib txhias tswv tsev yeej tsis sim ua dabtsi los tua cov kab txaj li, ntxawm tias txoj kevcai hais tias yog tus tswv tsev luag hawjlwm los kho lub tsev apartment.  Cov tswv tsev no yeej ua txhaum Minnesota txoj kevcai lawm. 

Feem ntau, cov tswv tsev ntiav cov kws tua kab tuaj tua cov kab txaj.  Tua kab txaj siv sijhawm ntev li ob peb lub lim tiam thiab siv ntau teev los npaj. 

Koj yuav tsum koom tes thiaj yuav tua tag cov kab txaj hauv chav tsev.  Piv ntxwv, tu koj lub tsev thiab muab tej yam khoom sw tshem mus.  Tua kab txaj tsis tuag coob yog muaj khoom nyob pawg lug ntawm tej.  Yog koj tsis koom tes, tej zaum yuav tua tsis tau cov kab txaj, thiab/lossis tej zaum koj tus tswv tsev yuav muaj cai ntiab koj tawm tsev. 

Nws yeej meej tseeb lawm tias tus tswv tsev yuav tsum yog tus kho lub tsev apartment.  Qhov no yog hais txog tua tej kab xws li kab txaj tibsi.  Tus tswv tsev yuav tsum them tus nqi tua kab tabsis tej tug tsis kam. 

Feem ntau, tus tswv tsev kam them tus nqi tua kab hauv lub tsev apartment tabsis tsis kam them tus nqi los npaj lub tsev apartment ua ntej tua kab.  Lossis pom tau tias koj tsis tshua nyob hauv lub tsev apartment thaum cov lim tiam uas tua kab ntawd thiab tej zaum yuav txo koj tus nqi tsev.  Tej lus no yog lub tsev hais plaub mam li txiav txim tau.

Yog koj toobkas kev pab los npaj lub tsev apartment rau lawv tua kab vim koj muaj mob, tej zaum tus tswv tsev yuav tau nrhiav qhov kev pab raws li txoj kevcai hauv Fair Housing Act thiab Minnesota Human Rights Act.  Sau ntawv thov kev pab thiab luam ib daim rau koj khaws cia.  Saib peb daim ntawv muaj tseeb, Ua Kom Tsim Nyog Nyob Taus: Koj Puas Xav Kom Koj Tus Tswv Tsev Hloov Tej Yam Vim Koj Qhov Xiam Oob Qhab?  

Tua kab txaj siv sijhawm.  Tej zaum yuav tau tua tshuaj rau koj chav tsev ob peb zaug ua ntej lawv tuag kom tas.  Cov kab txaj ciaj sia tau ntev heev thiab tej zaum lawv twb nteg qe uas twb yuav daug.  Muaj tej khoom npog thiab kav tsij ua li koj twb ua lawm mus li ib xyoos kom tsis txhob muaj lawv lawm.  Koj yuav tsum tas zog ua ntxiv mus thiab koom tes nrog tus kws tua kab.  Ua raws li lawv qhia kom txog thaum lawv hais rau koj tias cov kab tuag tas lawm.   

Koj tua cov kab txaj no koj tus kheej xwb ma nyuaj heev. Tabsis nws muaj tej yam uas koj ua tau pab kom tsis txhob kim ntxiv.  

• Qhov kub heev tua tau cov kab txaj.  Muab khaub ncaws ntxhua kom kub txog 97-99 degrees.  Ntxhua khaub ncaws thiab pam kom kub li kub tau (tsuas tsis ua lawv puas xwb) thiab tso lub ziab khaub ncaws rau “kub” thaum muab ziab kom tsawg kawg ntev li 45 feeb. Koj muab lawv ziab hauv lub ziab khaub ncaws kom kub yog tias koj ntxhua tsis tau lawv hauv dej kub.  

• Muab cov khaub ncaws thiab pam huv ntim kaw cia rau hauv lub hnab yas kom kab nkag tsis tau rau hauv.  Thiab muab cov khaub ncaws thiab pam uas koj twb muab ziab kub kub tag lawm ntim cia rau hauv cov hnab yas uas tsis tau siv dua.  Yuav cov ntaub npog txaj uas ua los tiv thaiv txaj ntawm cov kab txaj. 

• Nrog tej neeg nyob ze koj tham thaum koj paub tias koj muaj kab txaj hauv koj chav tsev lawm.  Yog koj nyob hauv ib lub tsev uas muaj ntau chav lossis lub tsev apartment, tseem ceeb heev uas koj yuav tsum lis ceev li ceev tau los tiv thaiv kom cov kab txaj tsis txhob kim mus rau lwm qhov chaw.  Qhia tej neeg nyob ze koj tias muaj kab txaj hauv koj chav, es lawv thiaj li paub tias tej zaum tagnrho lub tsev no muaj qhov teebmeem no thiab.  Lub sijhawm no zoo nug tej neeg nyob ze koj seb lawv puas paub tias tam sim no lossis yav tas los lawm puas tau muaj dua kab txaj hauv lub tsev lossis hauv koj chav tsev no. 

• Tsis txhob khaws tej rooj tog uas neeg muab pov tseg lawm.  Tsis txhob khaws tej yam khoom xws li txaj thiab rooj tog uas muab pov rau tom chaw pov tseg lossis muab tso tseg nram kev thauj kib nyiab.  Lawv muab pov tseg vim nws tsis zoo lawm.
  
  Yog koj yuav rooj tog, txaj lossis khaub ncaws tom cov khw qub, muab lawv saib zoo zoo seb puas muaj kab txaj ua ntej koj nqa lawv los tsev.

Cov kws tua kab muab tshuaj tua tau kab txaj ntawm tej txhia rooj tog.  Yog tias muaj kab txaj ntau heev, muab nws pov tseg zoo dua.  TSIS TXHOB muab cov rooj tog uas muaj kab txaj no mus povtseg rau tej qhov chaw uas lwm tug neeg yuav nqa tau.  Ua li no cov kab yuav kis ntxiv xwb.  

Ua zoo tshem lub rooj tog tawm hauv koj chav tsev kom cov kab txaj kis tsis tau mus rau lwm qhov chaw hauv lub tsev. 

Hais koj tus tswv tsev lossis tus kws tua kab pab koj muab tej rooj tog muaj kab txaj mus pov tseg. 

 Koj nrhiav tau ntaub ntawv ntxiv thiab kev pab ntawm: https://www.health.state.mn.us/diseases/pests/bedbugs.html (lus Askiv xwb)