Saamixida Khidmadaha Laanta Socdaalka

Kolka aad u dirsato codsi laanta socdaalka (immigration), badanaa waxaa jira kharash ama khidmad ay tahay inaad ku bixiso xareysiga codsiga. Marmarka qaarkood, waxa aad codsan kartaa “khidmad ka saamixid.” Hadii laanta socdaalku ay ansaxiso codsigaaga ka saamixida khidmada, ma aha inaad bixiso khidmadda xareysiga. Laakiin haddii khidmadda xareysiga lagaa saamaxo, waxaa dhici karta inaad wali bixiso khidmad kale.  

Si aad u hesho khidmad ka saamixida, waa inaad codsataa adigoo buuxinaya Foomka I-912, (Form I-912), Codsiga Khidmad Saamixida. Laakiin, waa inaad tusto laanta socdaalka inaadan bixin karin khidmada xareysiga. Waxa aad u baahan tahay inaad cadeyso ugu yaraan 1 ka mid ah sedexdaan waxyaabood:

1. Hadii aad hesho manfacyada dowlada sida kiro caawinta, cunto,  MFIP, SSI, ama MA.
      ama
2. Dakhligaagu uu hooseeyo
      ama
3. Ay ku haysato dar-xummo dhaqaale, sida kharashaad badan ama shaqo ama guri la’aan aad noqotay

Ogow: Waad aad sheegan kartaa hal mid ka badan oo sababahaa ah hadii aad cadeyn kartid. Laakiin waxaa ugu fududaan karta inaad hesho khidmad ka saamaxid haddii aad doorato hal wax kaliya. 

Kuwani waa qaabab aad ku cadayn karto inaad u baahan tahay khidmad saamixid:

• Hadii aad qorato inaad hesho manfacyo dowladeed, uga dir nuqul (copy) warqadda Degmadda ama Maamulka Sooshal Security (Social Security Administration Manfacyaddu waxa ay u baahan yihiin inay noqdaan kuwa adiga ama madaxa qoyskaaga ay ku qoran yihiin. Ee aysan noqon kuwo xubnaha kale ee qoyskaaga ama ciyaalka la siiyo. Warqadda aad soo dirto waa inay cadeyaa in aad hadda manfac dowladeed heshid, kolkaa hubi inay cadeyso waxyaabaha sidda nooca manfaca, waqtiga laguu ogolaaday, waqtiga ay dhacayso, iyo/ama waqtiga cusboonaysiinta. Ha isticmaalin daabacida ay baaqyada uuni ku qoran yihiin ee hay’ada USCIS ku aysan fahmi karin.
   
• Hadii aad qorato in dakhligaagu hooseeyo, ka soo dir nuqul warqadaha canshuurtii ugu dambeeysay ee aad xareysay ama nuquladdda (copies) jeegtaadda dabadooda ee ugu yaraan bishii la soo dhaafay. 
   
• Hadii aad qorato in dar-xuumo dhaqaale ay ku haysato, soo dir cadeyn. Tusaale ahaan, nuqulada biilalka waaweyn ee lagaa rabo, warqad qolada shaqadaada oo oranaysa in shaqadii kaa dhamaatay, cadeyn ah in gurigaaga lagaa saarayo. Sidoo kale ka soo dir nuqulada dhamaan biilalkaaga aad bil walba bixiso. 

Maya, uma aad isticmaali kartid saamixida khidmada dhamaan codsiyada laanta socdaalka.

Waxa aad u isticmaali kartaa codsiyada sida: 

• Form I-90 Codsiga lagu bedelayo Kaarka Degnaanshaha Rasmiga ah
• Form I-765 Codsiga Warqada Ruqsada Shaqada (marka laga reebo DACA)
• Form I-751 Arjiga ka Qaadida Shuruudaha Sharciga Deganaanta
• Form N-400 Codsiga Dhalashada (Muwaadinimada)
• Form N-600 Codsiga Shahaadadda Muwaadinimada 
• Form N-336 Codsiga dacwo dhagaysiga oo ku saabsan Go’aanka ka soo baxay Nidaamka Dhalasho Qaadashada sida ku qoran Qaybta 336 ee sharciga (tani waa racfaanka laga qaado diidmada muwaadinimada)
• Form I-485 Codsiga Isu-diiwaan gelinta Daganaansho rasmi ah ama wax looga Bedelayo Sharcigaaga. Kani waa codsiga kaarkaaga deganaanshaha (green card). Waxa aad u heli kartaa khidmad saamixid qaar ka mid ah kiisaska, laakiin aan ahayn dhamaan. Tusaale ahaan: waxa aad heli kartaa khidmad ka saamixid haddii aad tahay magangelyo codsade. Ogow: haddii aad tahay ama aad horey u ahayd dhibane tacadi loo geystay, aadna codsanayso sharci ku salaysan fiisaha U (U visa), fiisaha T (T visa), VAWA ama sharci Muhaajirka Gaarka ah, hadda wixii ka dambeeya ma ay jiri doonaan wax khidmad ah oo la bixinayo.
• Form I-290B Ogaysiiska Racfaan Qaadashada ama Dacwo. Marmarka qaarkood waxa aad u heli kartaa khidmad ka saamixid foomkan.

Wixii faahfaahin codsiyada aad u heli karo khidmad saamixida gal: https://www.uscis.gov/sites/default/files/document/forms/i-912instr.pdf. 

Bishii Luulyo 2025, sharci cusub ayaa wax ka bedelay khidmadaha codsiyo badan. Codsiyadda qaarkood, sharcigu waxa uu u baahan yahay khidmad cusub oo kale oo la socota khidmaha xareysiga. Xataa haddii aad xaq u leedahay saamixid khidmadda xareysiga, waa khasab inaad bixiso khidmad kale oo dheeraad ah.

Hadda waxaa jira khidmad $100 oo lagu bixiyo codsiyadda magangelyadda. Khidmadan lama saamixi karo. Intaa waxaa dheer, codsadayaasha magangelyaddu waa inay bixiyaan khidmad sannadle ah oo $100 ah sannad walba oo codsigoodda hawshiisu socoto. Ka ogow khidmadaha xareysiga iyo khidmadaha kale ee dheeriga ah ee wixii foom laanta socdaalku leedahay oo laga buuxinayo khadka (online) barta ah https://uscis.gov/g-1055. 

Hadii laanta socdaalku ay diido khidmad saamixida, waxa ay kuu soo diri ogaysiis ku waydiinaya inaad keento cadeymo kale oo ku saabsan sababta aadan u bixin karin khidmada. Codsigaaga iyo wixii kale ee warqado ah ee aad dirtay dib ayey kuu soo diri. Kolkaa waxa aad haysataa 2 waxyaabood oo aad kala dooran karto: 

1. Waxa aad dib ugu diri kartaa codsiga saamixida oo ay weheliyaan akhbaarta ay codsadeen, iyo codsiga iyo warqadaha kale, ama
2. Waxa aad soo diri kartaa codsigaaga uun waana aad iska bixin khidmada.

DIGNIIN!
Aad iyo aad u taxadar ka hor intaa aadan u gudbin codsi laanta socdaalka. Marmarka qaarkood, hadii codsigaaga la diido, waxaa lagu gelin karaa hanaanka dadka la masaafurinayo. Hadii aad horey u gaysatay dambiyada qaarkood, aad been u sheegtay dowlada waxaa lagu gelin karaa hanaanka dadka la masaafurinayo. XASUUSNOW: Laanta socdaalku waxa ay eegi kartaa DHAMAAN taariikhda oo dhan.

Ka hel talo qareen qaabilsan sharciyada laanta socdaalka. Qareenku waxa uu ka caawin karaa inuu hubiyo in wax walbaa hagaagsan yihiin!

Hadii waxa foomka ku qorani aysan adiga ku quseeyn ku qor "N/A" (Ma quseeyso) hadii aan tilmaamahu aysan kuu sheegin wax kale oo taa ka duwan. Hadii jawaabtu ay tahay waxba, ku qor “Waxba” ("None.")

Hadii aad ugu baahato meel badan si aad jawaab ugu qorto, isticmaal qaybta “akhbaarta dheeraadka ah” ee bogga ugu dambeeeya foomka ama warqad ka gooni ah foomka. Warqada korkeeda kore ku qor magacaaga iyo Lambarka Diiwaangelinta Dadka Qalaad (A-Number), hadii aad leedahay. Sidoo kale qor labadaba lambarka qaybta iyo kan shayga aad ka jawaabayso.

Calaamadi xulashada muujinaysa sababta aad u codsanayso khidmad saamixida. Waxa aad u baahan tahay inaad doorato mid uun, laakiin hadii in ka badan hal nooc ay adiga ku quseeyaan, waa aad dooran kartaa hal ka badan. Hadii aad doorato hal ka badan, waa khasab inaad bixiso dukumiintiyo mid walba gaar uga hadlaya.  

Dooro 1 hadii aad hesho manfacyo dowladeed (ee la yiraa “manfacyda danta ku xiran” sida MFIP, SSI, MA iwm Haddii xilahaaga, qof nolosha aad wadaagtaan, ama waalid uu helo manfacyo, siddoo kale waa aad dooran kartaa midan.   Xaq uguma lehid sababtan hadii ilmahaaga kaliya ahi ay manfacyada dowlada helaan. Waa inaad soo dirtaa dukumiintiyo cadeynaya inaad adiga (xilahaaga/qofka nolosha aad la wadaagto) aad heshaan manfacyo. Qoraal dhawaan ka soo baxay degmada ama Maamulka Sooshal Sakuuratiga (Social Security Administration) oo cadeynaya manfaca iyo cadadka adiga (ama iyagu) aad heshaan bil walba waa cadeyn wanaagsan. 

Dooro 2 hadii aadan helin manfac dowladeed laakiin dakhiga qoyskaagu uu yar yahay ama ka hooseeyo 150% Habraaca Saboolnimada ee Dowlada Dhexe. Waa inaad soo dirto canshuur-celintaada si aad u cadayso. Haddii aadan xareysan canshuur-celin ama dakhligaagu uu is-bedelay waxa aad soo diri kartaa jeeg shaqo dabadood ama cadeymo kale. Si aad u ogaato akhbaar ku saabsan Habraaca Saboolnimada ee Dowlada Dhexe gal: https://www.uscis.gov/forms/filing-fees/poverty-guidelines. Riix ka dibna linkiga yiraa I-912P. Riix falaarta hoos u jeeda si aad u xulato gobolkaaga. Ogow: dhamaan gobolada oo dhan marka laga reebo Alaska iyo Hawaii waxa ay soo hoos galaan midka koowaad.

Dooro 3 Hadii sababaha kale aysan adiga ku quseeyn laakiin ay ku haysato dar-xummo dhaqaale iyadoo sababtu waxyaabaha sida kharashaad caafimaad, shaqo la’aan guri ka saarid ama hoy la’aan. Waa inaad soo dirtaa dukumiintiyo cadeeya arrimahaa. Tusaale ahaan, nuqulada kharashaadka caafimaad ee lagugu leeyahay, warqad qolada shaqadaada oo oranaysa in shaqadii kaa dhamaatay, cadeyn ah in guriga lagaa saarayo.

Buuxi akhbaarta adiga kugu saabsan, hadii aad tahay qofka u baahan ka saamixid khidmada. Hadii aad leedahay cid aad mas’uul ka tahay oo iyana qayb ka ah codsiga, ku bixi akhbaartaa Qaybta 3.  

Hadii aad leedahay 2 magac oo dambe, ku qor labada magac ee dambe santuukha Magaca Qoyska.

Su’aasha 8 aad ee ku saabsan xaalada guurka, guurarka diinta ama dhaqanka uun la isku guursado ee dowlada wadanka aad u dhalatay aysan aqoonsanayn ma xisaabsana.

Hadii aad u codsanayso khimad saamixid hal codsiga oo adiga naftaada kaliya ah, kaliya ku buuxi hal layn oo santuukha ah kaliya akhbaartaada. Hadii aad u codsanayso ilmahaaga ama xilahaaga isla markaa aad codsanayso aadna doonayso in sidoo kale iyana laga saamaxo khidmadaha codsiyadooda, u buuxi hal layn oo santuukha ah qof walba ee codsi leh. Hadii xubnaha qoyskaagu aysan codsanayn isla markaa aad adigu codsanayso, uma baahnid inaad halkan ku qorto.   

Tusaale ahaan, hadii adiga iyo ilmahaagu aad labadiinuba codsanaysaan inaad noqotaan daganaanayaal rasmi ah isku mar, kolkaa waxa aad ku buuxin hal layn oo santuukhan ah akhbaartaada, hal layn oo kale oo santuukhan ahna waxa aad ku buuxin akhbaarta ilmaha. “Tirada guud ee foomamka” ee salka santuukhu waa inay is waafaqaan tirada codsiyada ah ee aad u dirayso laanta socdaalka hadii aad rabto in laga saamaxo khidmadaha dhamaan codsiyada oo dhan.

Hadii aad calaamadisay “1” qaybta 1, ee lagu codsanayo khidma ka saamixid sababta oo ah helida manfacyada dowlada (ee la yiraa “manfacyada baahida ku xiran” sida MFIP, SSI, MA iwm.) kolkaa waxa aad u baahan tahay inaad buuxsio qaybtan. Hadii aadan calaamadin lambar “1” Qaybta 1, ka BOOD qaybtan.  

U buuxi hal layn oo shaxanka ah qof walba oo hela manfac. Kolka la buuxiyo, waxa dhici karta inay u ekaato sidan:   

Ami Ahmed | Self | Hennepin County | MA | 03/17/2013 | 11/15/2017

Eeg warqadaha aad haysato ee aad ka heshay hay’ada ku siisa manfaca si aad u hesho akhbaartan. Waxaa dhici karta inaad u baahato inaad waydiiso hawl-wadeenkaaga akhbaarta ama warqad ay ku qoran yihiin manfacyada aad heshaa. 

Waa inaad soo dirtaa qoraalada cadeynaya manfacyada aad hesho iyo inta ay yihiin. Qoraal dhawaan ka soo baxay degmada ama Maamulka Sooshal Sakuuratiga (Social Security Administration) oo cadeynaya nooca iyo cadadka manfaca aad hesho waa cadeyn wanaagsan. Hadii aad u codsanayso saamixida khidmada sabab ah inaad qaadato manfacyo uun, kolkaa waxa aad u boodi kartaa Qaybta 7.

Hadii aad calaamadisay “B” Qaybta 1, oo aad ku codsanayso saamixida khidmada sababta oo ah in dakhligaagu yar yahay kolkaa waxa aad u baahan tahay inaad buuxiso qaybtan. Hadii aadan calaamadin lambar “B” Qaybta 1, ka BOOD qaybtan. 

Su’aalahaasi waxa ay ku waydiiyaan sida u kasbato lacag iyo cidda kula nool.

Su’aasha 2, “Manfacyada shaqaalaha shaqo la’aanta ah” macnahoodu waa jeeg ka yimaada Gobolka oo aad hesho. Manfaca shaqo la’aanta ah, sidoo kale badanaa waxaa lagaa rabaa inaad tagto meel shaqooyinka laga raajiciyo aadna la kulanto la taliye. Hadii aadan shaqo hayn laakiin aadan ka helayn wax lacag ah ama kulan ah hla taliyaha, kolkaa dooro “maya”.  

Su’aasha 3, ku dar adiga naftaadda, xilahaaga (hadii uu kula nool yahay) ilmaha adiga kula nool (haddii ay 21 sanno ka yar yihiin aysana guursan ama ay waqti buuxa iskuul dhigtaan ayna ka yar yihiin 24 jir aysana guursan), waalidkaa haddii ay kula nool yihiin, ama haddii cid kale oo aad mas’uul ka tahay aad canshuurta ku xareysatay. Haddii aadan ahayn qofka qoyska madaxada u ah, ku dar qofka qoyska madaxada u ah (qofka ku xaraystay canshuur-celinta inuu mas’uul kaa yahay ama dakhliga ugu badan uu soo galo). Eeg tilmaamaha foomka ama la tasho qareen haddii aadan hubin cidda lagu darayo jawaab-celintan.   

Su’aasha 7 waxa ay ku waydiisaa in dhamaan dakhliga xubnaha qoyska oo dhan loo xisaabiyo siddii iyagoo qayb ka wada ah xubnaha qoyskaaga. 

Waa inaad soo dirto canshuur-celintaadii ugu dambaysay ee aad xaraysay iyo marmarka qaarkood jeegta shaqada dabadooda ee cadeynaya dakhligaagga. Hadii ay jiraan wax isbedelo ah oo xaaladadaada ku yimi intii aad canshuurta xaraysay, u sheeg. Isbedelada waxaa ku jiri kara: inaad shaqadii aad wayday, aad heshay shaqo cusub, laakiin aad ka qaadato lacag ka yar tan tii shaqadii hore, ilmo kale ay kuu dhasheen, furiin, guur, aad heshay shaqo lacag badan leh. Ku qor waxa dhacay meesha banaan ee su’aasha 9.

Eeg inaad xaq u leedahay khidmad saamixida kolka aad isku wada darto dakhligaaga. Si aad uga eegto Habraaca Aqoonsiga Saboolnimada ee Dowlada Dhexe, gal shabakada: https://www.uscis.gov/forms/filing-fees/poverty-guidelines. Riix linkiga yiraa I-912P. Eeg dakhliga tirada dadka ee qoyskaaga ka dibna barbar dhig lambarka. Hadii lambarkaagu uu ka sareeyo, kolkaa waxaa dhici karta inaadan helin saamixida khidmada. Waxaa dhici karta inaad u baahato inaad ku darto akhbaar ku saabsan dar-xumo dhaqaale oo ku haysata, aadna calaamadisid“3” ee Qaybta 1. 

Hadii aad u codsanayso saamixida khidmada sabab ah dakhli hooseyn uun, kolkaa waxa aad u boodi kartaa Qaybta 7. 

Hadii aad calaamadisay “3” ee Qaybta 1, oo aad ku codsanayso saamixida khidmada sababta oo ah in dakhligaagu yar yahay kolkaa waxa aad u baahan tahay inaad buuxiso qaybtan. Hadii aadan calaamadin lambar “3” Qaybta 1, ka BOOD qaybtan.

Qor waxa jira oo ka dhigaya wax adag inaad lacag u hesho waxyaabaha sida khidmada codsiga. Qor sida dar-xummada dhaqaale ay lacagi kaaga baxday iyo waxa bixida lacagtaasi ay tahay. Tusaale waxaa noqon kara hadii qoyska arrin caafimaad ku soo korortay ayna galeen kharash caafimaad oo weyn oo laga rabo in ay bixiyaan. Ama hadii qof madaxda kuu ah ee shaqadu uu saacadahaagii shaqada jaray ama hadii aad shaqadii ay kaa dhamaatay.  Hadii aad u baahan tahay meel kale oo banaan oo aad wax ku qorto, isticmaal meesha banaan ee bogga 11.  

Su’aasha 3, geli santuukha wadarta kharashkaaga bisha. Calaamadi santuukha mid walba oo ah waxyaabaha aad bixiso bil walba oo lagu daray cadadka wdarta ah. Waa inaad soo dirtaa dukumiintiyo cadeynaha waxyaabahaa. Ku dar nuqulada heshiiska liiskaaga ee sheegaya kiradaada, iyo kharashaadkaaga kale ee sheegaya inta aad bixiso, nuqulada kharashaadka waaweyn, warqad qolada shaqadaada oo oranaysa in shaqadii kaa dhamaatay, cadeyn ah in gurigaaga lagaa saarayo.

Xulashadan waxaa caadiyan gaar loogu fidiyaa dadka leh dakhliga heerka 150% ka badan, laakiin dhawaan ay la soo darseen dar-xumooyin dhaqaale. Hadii aad midkan xulato, waa muhiim inaad cadeyso inaadan kaafiyi karin baahidaada lacageed ee bil walba iyadoo sababtu tahay dar-xummo dhaqaale awgeed.    

Hadii uu turjubaan caawiyey adiga ama qof xubin ka ah qoyskaaga turjubaanku waxa uu u baahan yahay inuu buuxiyo uuna saxiixo Qaybta 9. Hadii aadan isticmaalin turjubaan ku caawiya, uma baahnid inaad buuxiso qaybtan. 

Diyaariyahu waa cid walba oo aan adiga ahayn ee buuxisa foomkan. Waxaa ku jira qareeno, laakiin, waxa uu noqon karaa saaxiib, ehel, hawl-wadeen degmo ama cidii kale ee adiga akhbaarta kuugu qortay foomka. Hadii cid kale ay kaa caawisay buuxinta foomka, waxa ay u baahan yihiin inay buuxiyaan qaybtan. Hadii adigu aad wax walba qoratay, uma baahnid inaad buuxiso qaybtan.

Boostada soo dhig Foomka I-912 (Form I-912) iyada oo ay weheliso cadeyn ah sababta aad ugu baahan tahay saamixida khidmada codsigaaga. Ha soo kala dirin! Ku soo hagaaji ciwaanka lagugu siiyey tilmaamaha “Meesha laga Xareysto” ee codsigaaga laanta socdaalka ama foomka arjiga ah.