Kuv Txoj Haujlwm Qub Tiv Kuv Nyiaj Foob Nyiaj Haujlwm

Yog koj tawm lawm lossis poob koj txoj haujlwm thiab tsis tau raug them tagnrho koj cov nyiaj haujlwm, koj muaj feem ua ib qho “kev foob nyiaj haujlwm” rau koj lub chaw haujlwm. Yog koj yog ib tus neeg ua haujlwm ua vajtse/kho kev, koj muaj feem mus foob qhov chaw ntiav koj ua haujlwm lossis tus neeg ntiav koj ua ib yam haujlwm tshwj xeeb yuav nyiaj – lossis ob qhov tabsis. Yog koj yog ib tug neeg tuaj lwm tebchaws tuaj ua haujlwm ua liaj ua teb, koj muaj txoj cai nyob ntawm lub tsev koj qhov chaw ua haujlwm muab rau koj nyob kom txog thaum lawv them tagnrho koj cov nyiaj rau koj. Koj muaj feem tau tagnrho cov nyiaj koj khwv tau ua ntej koj tsis ua haujlwm lawm, txawm tias koj qhov tawm yog phem. Tej zaum koj muaj feem tau nyiaj ntaus zog rau kev nplua yog koj lub chaw haujlwm tsis ua raws li txoj cai hais txog kev them nyiaj haujlwm tom qab koj tsis ua haujlwm lawm. 

Xeev Minnesota txoj cai muaj txheej txheem raws rau kev rub nyiaj haujlwm. Yog koj yog ib tug neeg ua haujlwm rau koj tus kheej lossis muaj ntaub ntawv cog lus ua haujlwm, tej zaum cov cai txawv. Nyeem koj cov ntaub ntawv qhia tus kheej txog cov cai lossis ntaub ntawv ua haujlwm. Tsis yog txhua cov cai lossis ntaub ntawv ua haujlwm yuav mus raws cai lijchoj, ces hu rau ib tug kws lijchoj yog tias koj muaj lus nug. Daim ntawv qhia no tsis yog rau cov neej ua haujlwm rau nws tus kheej. 

Mus saib peb daim ntawv qhia Hom Haujlwm thiab Cov Cai Koj Muaj yog koj tsis paub tseeb. 

Nyiaj ua haujlwm yog suav koj cov nyiaj them raws ib teev, “overtime” ua haujlwm ntau tshaj 40 teev thiab/lossis nyiaj hli. Tejzaum cov nyiaj ua haujlwm kuj yog suav cov “bonuses” nyiaj txiaj ntsim thiab cov “commissions” nyiaj muag khoom uas koj khwv tau ua ntej koj poob koj txoj haujlwm. Tejzaum nyiaj ua haujlwm kuj yog suav cov sijhawm so (PTO) uas koj khwv thaum koj tseem ua haujlwm. Cov chaw ua haujlwm tsis tas yuav them cov sijhawm muaj mob thiab kev ruaj ntseg (ESST), tiamsis ib co chaw ua haujlwm txiav txim siab kam them. Nco tsoom saib cov phau ntawv qhia txog txoj haujlwm “employment handbooks,” cov ntawv cog lus ua haujlwm lossis txaus siab txog yuav khwv thiab siv koj cov PTO thiab ESST li cas.

• Yog koj raug rho tawm lossis tshem vim tsis muaj haujlwm ua, xeev Minnesota txoj cai hais tias yuav them koj tsis pub dhau 24 teev tom qab koj nug txog lawm. Koj yuav tsum sau ntawv mus nug kom them koj tsis pub dhau 24 teem. Tsis li ntawd, koj yuav raug them rau lwm lub caij raws li ib txwm them nyiaj rau koj tas los. 
   
• Yog koj tawm lossis sau ntawv tawm, yuav tsum them koj hnub ntawd lossis raws li lub sijhawm ib txwm them nyiaj rau koj tsuas yog tshe nws yog tsawg tshaj 5 hnub tom ntej. Ces lawv mam tos kom txog lub sijhawm thij ob uas yuav them nyiaj haujlwm. Lawv yuav tsum them koj tsis pub dhau 20 ntawm koj hnub kawg uas ua haujlwm. 

Yuav tsum them koj ntawm qhov chaw koj ib txwm tau koj cov tshev, tsuas yog tshe koj hais kom lawv xa koj daim tshev kawg tuaj.

Muaj tej txoj kev tshwj tau:

• Yog koj yog tus neeg ua haujlwm tsiv raws txog haujlwm, yuav tsum them koj tsis pub dhau 3 hnub yog koj tawm. Yog koj raug rho tawm lossis so haujlwm vim tsis muaj haujlwm, cov cai yeej raws li cov muaj saud los –lawv yuav tau them koj tsis pub dhau 24 teev tom qab koj nug txog. 
   
• Yog koj nyob rau koomhaum haujlwm pab pawg neeg uas muaj kev sablaj kom pom zoo, tej zaum kuj muaj lwm cov cai txawv.
   
• Yog hais tias koj qhov chaw ua haujlwm lossis qhov chaw ntiav koj ua haujlwm ua ntaub ntawv poob nyiaj txiag tas ua ntej them koj, mus ua ntaub ntawv hauv tsev hais plaub txog poob nyiaj txiag. Muaj 4 lub tsev hais plaub txog poob nyiaj txiag hauv Minnesota, thiab koj muaj feem tso koj lub npe rau daim ntawv sau cov npe ntawm cov neeg uas yuav tsum raug them. 
  
  Feem ntau, tsev hais plaub txog kev poob nyiaj txiag muab cov rooj plaub txog nyiaj haujlwm los tso ua ntej lwm cov rooj plaub. Qhov no txhais tias koj muaj feem tseem yuav tau nyiaj them txawm tias zoo li lub chaw haujlwm twb tsis muaj nyiaj lawm. Nco ntsoov mus ua ntaub ntawv rub koj cov nyiaj haujlwm!
   
• Yog koj saib txog nyiaj txiag lossis vajtse hauv koj txoj haujlwm, lub chaw haujlwm siv tau 10 hnub tom qab koj hnub kawg uas ua haujlwm los saib xyuas koj tej ntaub ntawv haujlwm ua ntej them koj. 

Feem ntau, cov chaw haujlwm tsis muaj cai thau nyiaj tawm ntawm koj daim tshev haujlwm rau cov khoom haujlwm uas ploj mus lawm, raug nyiag, lossis piamsij lawm. Lawv ua tau yog koj sau ntawv pom zoo rau nws tom qab ploj mus lossis piamsij tshwmsim, lossis yog tias lub tsev hais plaub txiav txim tias koj yog tus txhaum. 

Nug txog cov nyiaj haujlwm uas tsis tau them tuaj kom sai li sai tau tom qab koj tawm koj txoj haujlwm. Qhov no yog hu ua kev hais rub nyiaj haujlwm. Koj yuav tsum sau ntawv sau mus hais tiamsis tsis tas yuav hais qhov nyiaj tiv pestsawg.

Muaj ib tsab ntawv pivtxwv los nrog rau daim ntawv no. Sau ua koj cov lus, xee npe thiab sau hnub tim rau tsab ntawv. Luam ib daig khaws cia. Nug lub chaw haujlwm kom them koj tagnrho koj cov nyiaj haujlwm thiab cov nyiaj uas tau tas haj sai li sai tau. 

Yog koj qhov chaw ua haujlwm tsis them koj tom qab txais koj daim ntawv, yog xav paub ntxiv lossis xav tau kev pab ua ntaub ntawv rub nyiaj haujlwm tiv tauj lub MN Department of Labor thiab Industry (DLI) ntawm dli.laborstandards@state.mn.us lossis hu rau lawv ntawm 651-284-5075 lossis 800-342-5354. Lawv tuaj yeem pab koj ua ntawv thov kom tau cov nyiaj ua haujlwm uas koj tsis tau txais. Tom qab tiv tauj lawv lawm, ib tug neeg tshawb xyuas mam li hu koj tsis pub dhau 3 hnub ua haujlwm tuaj nug koj lus ntxiv txog koj daim ntawv thov thiab xamphaj koj.

Yuav tsum muaj cov no thaum xamphaj koj:

• Koj qhov chaw ua haujlwm npe thiab xovtooj lossis email
• Them nyiaj pestsawg rau koj
• Cov hnub koj ua haujlwm uas tsis tau them
• Hnub kawg koj ua haujlwm
• Hnub kawg koj hais kom them nyiaj rau koj (yog koj tau ua li no)

Nco ntsoov: Koj tsis tas yuav thov kom them nyiaj ua haujlwm rau koj thiaj li ua tau daim ntawv thov nyiaj ua haujlwm. 

Tom qab xamphaj tas, DLI mam li tshawb xyuas koj cov lus thov nyiaj ua haujlwm thiab pab los kho qhob teebmeem no.

Feem ntau, cov chaw ua haujlwm tsis them nyiaj thiab nyiaj tshaj thas sijhawm. Yog koj tus tsis them raws sijhawm, tej zaum koj yuav tau foob lawv. Foob tau ob qhov nyiaj tiv thiab tus nqi nplua uas tsis them thas sijhawm.

Yog cov nyiaj thiab nqi nplua raug $20,000 lossis tsawg dua, koj mus foob hauv Conciliation Court-Chav hais plaub neeg sib foob neeg. Yog hais tias tus nqi tshaj $20,000 koj yuav tau mus nrhiav ib tus kws lijchoj vim hais tias koj yuav tsum mus foob koj rooj plaub hauv District Court-Chav hais plaub loj.

Yog qhov chaw ua haujlwm txiav txim kam them nyiaj rau koj, ua zoo xav ua ntej koj foob lawv. Yog koj mus hais nram tsev hais plaub thiab tus kws txiav txim plaub txiav txim tias qhov chaw ua haujlwm tsuas tau them qhov nyiaj lawv muab rau koj lossis tsawg dua, ces tej zaum koj yuav tau them qhov chaw ua haujlwm tus nqi kws lijchoj. Tiamsis, yog lawv txiav txim hais tias koj yuav tsum tau ntau tshaj li koj qhov chaw haujlwm muab rau koj, ces tej zaum qhov chaw ua haujlwm yuav tau them koj tus nqi kws lijchoj. 

Koj yuav tsum foob ua ntej dhau 2 xyoos ntawm hnub koj tsis tau txais koj cov nyiaj haujlwm. Qhov no tej zaum yog hnub kawg ntawm koj kev ua haujlwm, lossis tej zaum yog ua ntej lawm, yog koj twb tsis tau txais nyiaj haujlwm ib ntus ua ntej koj tawm haujlwm. Txoj cai uas tswj sijhawm foob yog 2 xyoos ntawm hnub tim uas yuav tsum raug them daim tshev ntawd tuaj rau koj. Pib koj rooj plaub foob kom sai li sai tau thiaj li tsis poob koj cov khoom pov thawj thiab tim khawv. 

Yog xav paub ntxiv txog Minnesota cov cai txog kev rub nyiaj haujlwm, kev nyiag nyiaj haujlwm, kev them nyiaj ua haujlwm dhau sijhawm, thiab kev yuam menyuam ua haujlwm, hu rau Minnesota Department of Labor thiab Industry ntawm (651) 284-5070 lossis 1-(800) 342-5354 lossis mus rau lub vassab ntawm www.dli.mn.gov.