Tej zaum koj tus tswv tsev yuav hais tias koj khiav tawm lub tsev kem. Yog koj cov khoom tseem nyob hauv thiab koj tsis tau qhia rau koj tus tswv tsev tias koj yuav tsiv tawm, ces koj tsis tau khiav tawm tsev. Tus tswv tsev yuav tsum ua ntawv foob ntiab koj tawm tsev ua ntej nws tshem tau koj cov khoom lossis hloov cov pob xauv qhov rooj.
Tej zaum koj yuav muaj cai kom cia koj mus rau hauv tsev txawm tias koj tsis tau tsiv mus nyob hauv. Yog koj xee daim ntawv xauj tsev thiab muab nyiaj rau tus tswv tsev them nqi tsev lossis nyiaj cas, tus tswv tsev yuav tsum cia koj tsiv los rau hauv lub tsev thaum hnub tim daim ntawv xauj tsev pib. Yog tus tswv tsev tsis kam cia koj mus hauv, koj muaj cai pib ua ntawv foob xauv tawm thiab kom cia koj mus tau hauv lub tsev.
Cov neeg nyob cov tsev ib ntus xwb los yeej muab lawv xauv tawm tsis tau. Koj muaj txoj cai tsis txhob raug xauv tawm ntawm koj lub tsev txawm hais tias koj lub tsev yog tsev muaj neeg pab, tsev nyob txiav yeeb tshuaj, tej txhia tsev rau tib neeg nyob thaum tsis muaj tsev “shelter”, thiab lwm yam tsev nyob. Tej zaum cov tswv tsev khiav cov tsev zoo li no yuav hais tias lawv yuam tau koj tawm tau txawm yog tias lawv tsis mus ua ntawv foob ntiab koj tawm tsev. Lawv hais tsis yog lawm. Txawm yog tias koj nyob hauv cov tsev ib ntus xwb, los koj muaj cov cai nyob hauv daim ntawv tseeb no. Koj hais tau kom tsev hais plaub yuam kom nroog cov tub ceevxwm pab koj rov qab mus hauv tsev sai li sai tau. Yog koj tsis paub tseeb tias koj lub tsev tamsim no puas muaj kev tiv thaiv ntawm qhov raug xauv tawm, tiv tauj koj lub hoobkas legal aid ntawm 1-(877) 696-6529.
Koj kuj nug tau kom tsev hais plaub teem rooj plaub los txiav txim seb tus tswv tsev puas tau them nyiaj (puas tsuaj) rau qhov muab koj xauv tawm. Tsev hais plaub yuav tsum xee ib daim ntawv rau koj coj tub ceevxwm nrog koj mus. Nroog cov tub ceevxwm muaj feem cia koj rov mus hauv, txawm tias lawv yuav tau tsoo tsev.
Koj qhov puas yog cov nyiaj koj poob lossis yuav tau siv vim raug xauv tawm. Qhia tsev hais plaub txog tej khoom puas, mus tsis tau haujlwm, mus tsis tau ntsib kws kho mob (lossis lwm yam), nqi them tsev pw, nqi roj thiab zaub mov, lossis lwm yam nqi. Khaws cov ntawv them nqi thiab nqa lawv mus hauv tsev hais plaub.
Koj kuj tau peb npaug rau qhov puas tsuaj (3 npaug koj cov nqi), lossis $500. Seb qhov twg ntau tshaj, ntxiv tus kws lij choj qhov nqi, yog tias:
- Tus tswv tsev kaw koj fais fab, dej, cua sov, lossis nkev THIAB koj qhia tus tswv tsev txog lawm, tabtsis tus tswv tsev tsis hais kom rov qhib koj cov fais fab, dej cua sov raws li sijhawm tsim nyog.
LOSSIS
- Tus tswv tsev coj tau “phem.” Feem ntau, coj tau phem txhais tias dag, khib lav, lossis paub tias nws txhaum tabsi tseem ua thiab.
Yog koj yeej nyiaj puas, hais tus kws txiav txim cia koj muab nrho tawm ntawm koj qhov nqi tsev. Hais kom luam daim ntawv txiav txim rau koj. Yog tus tswv tsev ua ntawv foob ntiab koj tawm tsev vim tias koj tsis them nqi tsev, muab daim ntawv txog koj rooj plaub raug xauv tawm rau tus kws txiav txim saib.
