Rho Menyuam Kawm Ntawv Tawm Ib Ntus

Thaum tus menyuam ntsib teebmeem tim tsev kawm ntawv, lub tsev kawm tawv yuav tsum ua raws li txoj cai.  Txhua koog tsev kawm ntawv yuav tsum muaj txoj cai txog kev qhuab qhia.  Muab tau tus menyuam kawm ntawv rho tawm ib hoob xwb, ib hnub lossis ntau hnub.  Yog pheej coj tus cwjpwm phem ntxiv mus, tej zaum yuav muab tus menyuam kawm ntawv nrho tawm ntawv.  Nug koj tus menyuam lub tsev kawm ntawv kom lawv luam ib daim ntawv kevcai qhuab qhia rau koj.  Paub cov cai koj tus menyuam muaj.  

Yog koj tus menyuam muaj kev xiam oob qhab lossis tau kev kawm pab tshwj xeeb, nws muaj ib co kevcai ntxiv lub tsev kawm ntawv yuav tau ua raws li. Yog xav paub ntxiv, hu rau Minnesota Disability Law Center ntawm (612) 332-1441 lossis 1(800) 292-4150.  

Tshem Tawm:  Tshem tus menyuam kawm ntawv tawm ntawm tej hoob lossis tej yam kev ua si. Qhov no tsis pub ntev dua 5 hnub.

Rho Tawm Ib Ntus:  Tsis pub tus menyuam kawm ntawv mus kawm lub tsev kawm ntawm 1‑10 hnub. 

Rho Npe Tawm Kawm Ntawv Txog 12 lub Hlis:  Tsis pub tus menyuam kawm ntawv mus tim nws lub tsev kawm ntawv, lossis lwm lub tsev kawm ntawv hauv koog tsev kawm ntawv, kom ntev tsis dhau 12 lub hlis.   

Rho Npe Tawm Kawm Ntawv Xyoo Ntawd:  Tsis pub tus menyuam kawm ntawv mus cuv npe lossis rov qab cuv npe kawm ntawv rau hauv ib lub tsev kawm ntawv kom tas xyoo ntawd. 

Yuav nrog tsev kawm ntawv sib cam txog qhov rho tawm tsev kawm ntawv ib ntus lossis muab lawv tshem tawm mas nyuaj heev.  Yog li ntawd, nws yog ib qho zoo tswv yim mus nrog tsev kawm ntawv sib tham los nrhiav lwm txoj kev kom tsis txhob raug rho tawm ib ntus lossis lwm yam kev qhuab qhia rau yam tom ntej.  Tej yam xws li, pab tus menyuam kawm ntawv ntau dua, sib txuas lus nrog niam txiv kom zoo dua, lossis lwm txoj kev los kho nws tus cwjpwm. Yog koj ntseeg tias qhov kev qhuab qhia tsis yog raws li lub tsev kawm ntawv txoj cai, koj mus ua ib daim ntawv tsis txaus siab tau.   

Muaj ntau yam cwjpwm tsis zoo uas raug qhuab qhia tau.  Ob yam uas pom heev tshaj plaws yog: 

• Sib Ntau – Menyuam kawm ntawv raug qhuab qhia yog sib ntau, thawb, lossis chua.  Tej zaum ob tug menyuam kawm ntawv xuas nrig sib ntaus yuav raug rho tawm ib ntus.  Txawm hais tias leej twg yog tus pib ua ntej.  Tej zaum tsev kawm ntawv yuav txiav txim  rho tawm tus menyuam uas ua raug mob rau lwm tus menyuam. 
   
• Saib Tsis Tau – Cov menyuam kawm ntawv uas saib tsis tau lawv tus xibfwb muaj feem raug rho tawm ib ntus. Ib tus menyuam kawm ntawv raug tshem tawm lossis rho tawm ib ntus yog tias nws tsis ua li tus xibfwb hais lossis pheej cam nrog tus xibfwb thiab siv lus phem. 

Tsev kawm ntawv yuav tsum:  

• Kom koj tus menyuam ntsib nrog ib tug neeg khiav haujlwm hauv tsev kawm ntawv, 
• Piav seb muaj povthawj dabtsi, 
• Qhia koj tus menyuam tias vim li cas thiaj li muab rho tawm ib ntus, thiab  
• Cia koj tus menyuam piav nws zaj. 
   

Tej zaum lub tsev kawm ntawv yuav muaj rooj sib tham tom qab muab rho tawm yog hais tias nws muaj "kev phom sij txaus thiab tamsin ntawd" rau lwm cov menyuam kawm ntawv lossis koj tus menyuam. 

Lub tsev kawm ntawv yuav tsum muab lwm cov kev pab cuam kawm ntawv rau txhua tus raug rho tawm ib ntus ntev tshaj 5 hnub. Rau txhua yam kev raug rho tawm, lub tsev kawm ntawv yuav tsum muab sijhawm rau koj tus menyuam ua “homework” cov ntawv hauv tsev thaum lub sijhawm raug tshem tawm kom koj tus menyuam thiaj li tsis poob qab nws cov hoob kawm ntawv. 

Lub tsev kawm ntawv yuav tsum sau ib daim ntawv rau koj tus menyuam qhia txog:   

• Vim li cas thiaj raug rho tawm ib ntus,  
• Ua li cas,  
• Koj tus menyuam thiab lwm tus tim khawv hais li cas txog qhov ntawd,  
• Ib txoj kev npaj yuav rov txhais koj tus menyuam rov tuaj kawm ntawv, thiab 
• Ib daim ntawv sau qhia txog koj tus menyuam cov cai.   
   

Koj tus menyuam yuav tsum tau daim ntawv no ua ntej lossis thaum lub sijhawm nws raug rho tawm ib ntus.  Lub tsev kawm ntawv yuav tsum xa ib daim rau koj tsis pub dhau 48 teev tom qab rooj sablaj.  Lawv yuav tsum hu xov tooj rau koj sai li sai tau tom qab qhov rho tawm ib ntus.