MFIP Kev Npaj Mus Ua Haujlwm
Daim ntawv qhia no tham txog MFIP Cov Kev Npaj Ua Haujlwm, yuav ua li cas thiaj tau ib qho, thiab yuav ua li cas yog tias koj ua tsis tau raws li koj qhov.
Tsim Koj Qhov Kev Npaj Mus Ua Haujlwm (EP)
Txhua leej niam txiv lossis neeg tus menyuam uas tau txais MFIP yuavtsum koom tes nrog ib tus kws pab nrhiav haujlwm thiab sau ib qhov Kev Npaj Mus Ua Haujlwm (EP). EP yog cov uas yuav tau sau ib zaug tauj 3 lub hlis twg lossis thaum yuav tau hloov tej yam uas koj ua, seb qhov twg los ua ntej ces raws qhov ntawd. Yog koj tsis ua raws tej yam nyob rau koj txoj kev npaj ntawd, koj yuav raug txim nplua. Qhov no Txhais tau tias tagnrho lossis ib feem ntawm koj qhov MFIP yuav raug tshem tawm mus. Mus saib peb daim ntawv qhia tseeb MFIP & FSS Hauj lwm Kev Nplua.
Muaj ib co cai tswj txog seb koj yuav tau siv pestsawg teev los ua tej yam nyob rau koj qhov EP.
- Yog tias koj ib leeg yog niam lossis txiv xwb thiab koj ho muaj menyuam 5 xyoos lossis yau dua, koj yuav tau ua kom txwm 87 teev tauj ib hlis.
- Yog tias koj ib leeg yog niam lossis txiv xwb thiab cov menyuam hlob tshaj 5 xyoos rov saud lawm, koj yuav tau ua 130 teev tauj ib hlis.
- Yog tias muaj ob leeg niam thiab txiv hauv koj lub tsev, neb muab neb cov sijhawm los tso uake thiab yuav tau tshaj 55 teev tauj ib lim tiam.
Tej zaum koj tus kws pab nrhiav haujlwm yuav muaj cov teev ntau tshaj no hauv koj txoj kev npaj. Koj kuj muaj cai xaiv ua kom cov teev ntau tshaj no thiab kom koj thiaj li tau txais kev pab zov menyuam rau koj txoj kev ua no. Tiamsis, koj yuav tsis raug txim nplua yog tias koj yeej ua raws cov kev ua no raws li cov teev uas muaj sau saum toj. Yog muaj kev hawv tias yuav muab koj rau txim nplua, tiv tauj koj lub hoobkas legal aid pab cai lij choj hauv koj lub nroog.
Feem Ntau Ntawm Cov EP
- Yog koj ua haujlwm tsawg kawg nkaus li cov teev sau saum toj, tejzaum qhov ntawd yuav yog tib yam muaj nyob rau koj txoj kev npaj.
- Yog koj tsis ua haujlwm cov teev tsawg kawg nkaus, koj tus kws pab nrhiav haujlwm yuav ntxiv lwm yam kev ua rau koj.
- Yog koj tsis ua haujlwm, koj tus pab nrhiav haujlwm muaj feem hais kom koj mus nrhiav haujlwm lossis koom tej yam kev nrhiav haujlwm. Tej yam no muaj xws li sau koj daim ntawv keebkwm nrhiav haujlwm lossis mus rau cov kev cob qhia txog xam phaj nrhiav haujlwm. Yog koj nrhiav tsis tau haujlwm dhau 3 lub hlis, tejzaum koj yuav tau mus ua haujlwm pub dawb.
- Kev mus kawm ntawv (kawm ntawv rau cov neeg muaj hnub nyoog, kawm GED, kawm ESL, kawm ntawv tiav ob xyoos, thiab kawm tiav plaub xyoos) kuj nyob tau koj txoj kev npaj. Mus saib peb daim ntawv qhia tseeb MFIP: Kev Kawm thiab Cob Qhia Ua Hauj Lwm.
- Yog muaj tej yam koj yuavtsum ua xws li coj koj tus kheej mus lossis coj koj tus menyuam mus saib kws kho mob lossis mus rau tej yam uas tsev hais plaub kom koj mus ua, nrog koj tus kws pab nrhiav haujlwm tham. Tej yam no yuav muab ntxiv tau rau koj txoj kev npaj. Lossis tej zaum koj muaj feem tau qhov hu ua Family Stabilization Services (saib hauv qab).
Hos yog kuv ua tsis tau ntau npaum li ntawd ne?
Puas yog muaj tej yam hauv koj lub neej uas nyuab rau koj ua kom tiav raws cov teev uas lawv hais tias koj yuav tau ua? Qhia rau lawv paub. Tej zaum koj muaj feem txais ib txoj kev npaj nrhiav haujlwm txawv lossis raug hloov mus rau qhov hu ua Family Stabilization Services (FSS). FSS kuj pab tsev neeg ib yam nkaus tiamsis feem ntau cov teev thiab haujlwm tsawg zog. Mus saib peb daim ntawv qhia tseeb Kev Pab Cuam Tsev Neeg.
MFIP qhov kev hloov npaj mus ua haujlwm thiab FSS cov kev npaj mus ua haujlwm yuav muaj haujlwm tsawg dua lossis teev nrhiav haujlwm tsawg dua. Nyob ntawm koj qhov teebmeem. Yog ib tug kws kho mob hais tias vim li cas koj thiaj li ua tsis tau haujlwm, nqa ib daim ntawv ntawm koj tus kws pab nrhiav haujlwm mus rau koj tus kws kho mob sau. Nrog koj tus kws pab nrhiav haujlwm tham txog koj qhov teebmeem uas ua nyuab rau koj mus ua haujlwm thiab tej zaum koj yuav tau ua lwm yam kev ua txawv. Yog koj kws pab nrhiav haujlwm hais kom koj ua ib yam dabtsi koj ua tsis tau, tiv tuaj legal aid.
Koj muaj feem txais kev npaj nrhiav haujlwm txawv lossis raug hloov mus rau FSS yog tias:
- Koj muaj 60 xyoo lossis laus dua
- Koj muaj mob lossis xiam oob qhab
Qhia rau lawv tias koj ua ntaub ntawv thov SSI lossis RSDI lossis muab tim khawv los ntawm kws kho mob uas qhia tias koj tus mob lossis kev raug mob- yuav ntev dua 30 hnub, thiab
- sab heev uas koj cia li nrhiav tsis taus haujlwm lossis mus ua haujlwm lossis ua haujlwm ntev tshaj 20 teev lossis ntau dua tauj ib lim tiam. Kev tabseeb kuj yog kev tsis taus thiab, yog koj qhia tau tias koj ua tsis tau haujlwm vim qhov ntawd.
- Muaj ib tug Menyuam lossis Neeg Laus hauv Koj Tsev Neeg Uas Koj Yuav Tau Nyob Tsev Tu.
Muab povthawj ntawm ib tug kws kho mob los:- Tus tib neeg ntawd muaj mob lossis xiam oob qhab
- Tias txoj kev mob yuav ntev dua 30 hnub
- Tias koj yuav tau nyob tsev tu tus neeg ntawd
- Lossis qhia tias tus tib neeg hauv koj tsev neeg ntawd muaj feem txais kev raug tu hauv tsev lossis kev khiav ntaub ntawv tu
- Muaj ib tug Menyuam lossis Neeg Laus hauv Koj Tsev Neeg Uas Muaj Feem tau Txais Kev Kho Mob Tshwjxeeb
Pivtxwv: ib tug menyuam uas muaj teebmeem puas siab puas ntsws heev lossis tus neeg laus uas muaj mob hlwb mus tsis tus ncua. Muab povthawj txog tus mob no los ntawm kws kho mob los lossis tus kws kho mob nyuab siab/mob hlwb. Koj tsis tas yuav muaj povthawj tias koj yuav tau nyob hauv tsev rau hom no.
Yog koj muaj feem ces koj cov hli uas siv MFIP yuav raug “khaws tseg.” Qhov no txhais tau tias koj muaj feem txais ib hlis MFIP tshaj 60 lub hlis rau txhua hlis uas koj muaj feem rau qhov no. Nug koj tus kws pab nrhiav haujlwm thiab kws pab txog nyiaj txiag kom paub tau tseeb tias koj cov hli yeej raug khaws tseg cia tiag.
- Koj yog ib tug Uas Raug Kev Tsim Txom Hauv Tsev Neeg
Koj yuav tau ntxiv ib daim ntawv zam vim kev raug tsim txom hauv tsev ntxiv rau koj Txoj Kev Npaj Nrhiav Haujlwm. Daim ntawv zam yuav tau yog koj tus kheej sau, koj tus kws pab nrhiav haujlwm sau, thiab ib tug sawv cev pab cov neeg raug tsim txom sau. Thaum koj muaj ib daim ntawv zam vim kev raug tsim txom hauv tsev neeg lawm, koj yuav tau txais tej yam koj ua uas yog los tiv thaiv koj tus kheej kom nyabxeeb. Koj tsis tau ua haujlwm yog hais tias tsis muaj kev ruaj ntseg rau koj.
Yog koj tsis muaj ib tug sawv cev pab cov neeg raug tsim txom, koj tus kws pab nrhiav haujlwm yuav tau qhia koj mus rau ib tug. Mus nrhiav ib tug sawv cev koj tus kheej, hu (866) 223-1111. Cov hli uas koj muaj ntawv zam vim kev raug tsim txom hauv tsev neeg yuav tsis suav los rau koj 60 lub hlis siv MFIP.
Mus saib peb daim ntawv qhia tseeb MFIP thiab FSS rau Cov Tib Neeg Raug Tsim Txom hauv Tsev Neeg.
- Koj tabtom muaj teebmeem ntawm koj Tus Kheej lossis Tsev Neeg
Koj ua tsis tau raws li koj txoj kev npaj nrhiav haujlwm vim muaj teebmeem no. Lub nroog yuav nug kom muaj povthawj tias seb teebmeem loj li cas. Pivtxwv txog teebmeem ntawm tus kheej lossis tsev neeg yog tsis muaj tsev nyob, raug ntiab tawm tsev, nyob cov chaw so uas txais neeg tsis muaj tsev nyob, dej, fais fab, cua so/txias raug kaw, thiab xwm ceev muaj mob.
- Koj tsis yog neeg pejxeem uas nyob rau U.S. tau tsawg dua ib xyoos thiab muaj feem txais MFIP
- Lwm Yam Uas Muaj
Yog koj muaj kev kawm tsis taus ntawv lossis IQ qis thiab muaj teebmeem nrhiav haujlwm thiab tuav txoj haujlwm, muaj ntaub ntawv keebkwm raug txim uas ua rau nyuab nrhiav haujlwm, lossis lwm yam uas ua rau koj nrhiav tsis tau lossis tuav tsis tau txoj haujlwm, qhia rau koj tus kws pab nrhiav haujlwm. Tejzaum koj kuj muaj feem tau txais kev nrhiav haujlwm txawv lossis FSS.
Zov/Tu Menyuam
Yog tias koj muaj menyuam yau tshaj ib xyoos, koj muaj feem xaiv tsis ua haujlwm nrog ib tug kws pab nrhiav haujlwm kom koj nyob tau hauv tsev nrog koj tus menyuam. Koj siv tau txoj kev no mus txog 12 lub hlis hauv koj lub neej. Koj muaj feem siv tagnrho 12 lub hlis nrog ib tug menyuam lossis muab cov hli ntawd faib rau 2 lossis coob dua tus menyuam yog tias koj npaj yuav yug menyuam ntxiv.
Nyob rau cov tsev neeg uas muaj ob leeg niam thiab txiv tibsi, tsuas yog 1 leeg niam los leeg txiv thiaj li ua tau li no rau lub sijhawm xwb, thiab tsev neeg ntawd tau txais tagnrho 12 lub hlis uake– tsis yog 12 lub hlis rau ib leej niam lossis txiv.
Leej Niam Lossis Txiv Uas Yau Dua 20 Xyoo
Cov niam lossis txiv uas yau dua 20 xyoo uas tseem kawm ntawv theem hoob 9 txog 12 lossis kawm daim GED tsis tas yuav ua haujlwm. Koj tus kws pab nrhiav haujlwm yuav taug qab saib seb koj puas ua tau raws li tsev kawm ntawv txoj cai tswj mus kawm ntawv.
“Muaj Tej Yam Tseemceeb” Tsis Tas Ua Haujlwm
Tej zaum koj kuj muaj “tej yam tseemceeb” uas tsis kom koj ua tej hom kev kawm haujlwm. Tej yam tseemceeb yog xws li tsis muaj tsheb lossis tsis muaj neeg zov menyuam, lossis yuav mus ntsib MFIP tib lub sijhawm li koj rooj plaub tim tsev hais plaub lossis koj cov sijhawm ua haujlwm.
“Muaj tej yam tseemceeb” tsis yog ib qho yooj yim nrhiav povthawj los rau. Yog koj muaj tej yam tseemceeb ua rau koj tuaj tsis tau rooj sib ntsib, hu mus rau koj tus kws pab nrhiav haujlwm kom hloov lub sijhawm sib ntsib. Txhua lub sijhawm koj ua tsis tau raws li yam nyob hauv koj txoj kev nrhiav haujlwm lossis txoj kev npaj nrhiav haujlwm, qhia rau koj tus kws pab nrhiav haujlwm seb yog vim licas. Ua li no tam sim ntawd!
Yog Koj Ua Tsis Tau Haujlwm Lossis Ua Tsis Tau Txhua Yam Ntawm Koj Txoj Kev Npaj
Yog koj ua tsis tau haujlwm, qhia rau koj tus kws pab nrhiav haujlwm tamsim ntawd! Nrhiav povthawj los qhia vim li cas. Nug txoj kev npaj nrhiav haujlwm txawv lossis kom muab koj hloov mus rau FSS. Yog lawv tsis kam muaj ib qhov rau koj, kom lawv sau ntawv tuaj hais tias tsis kam. Sau ib tsab ntawv rov mus hais dua. Mus saib peb daim ntawv qhia tseeb Rov Hais Dua Txog Tsoomfwv Nyiaj Pab Pejxeem (Welfare) rau DHS.
Hu koj lub legal aid hoobkas hauv lub zos rau kev pab. Mus nrhiav lub hoobkas hauv koj lub zos ntawm 1-(877) 696-6529.
Lossis mus nrhiav kev pab los ntawm lwm cov kev pabcuam ntawm www.lawhelpmn.org/hm/providers-and-clinics.